​Ај ако смееш стани претприемач

​​Јас сум од област на образование: со месеци живеев во страв дека поради некакво ЕВЕНТУАЛНО погрешно разбирање на законот ќе бидам казнет за постапки кои сум ги спроведувал во согласност со моето најдобро разбирање на законот и најмалку 10-годишно искуство во областа на администрација во областа на образование. Од документ кој беше измислен како импровизација за „пополнување дупка во закон“ проблемот беше издигнат до степен на нерешливост и покрај мојата подготвеност да направам се да се реши - администрацијата даваше контрадикторни „совети“ (информации), правната служба не сакаше ни да се вклучи во толкување а адвокатските совети кои ги добивав потврдуваа дека или администрацијата нема поим од законот или намерно глуми лудило за да застрашува и казнува. Конечно, бев казнет 2500 евра и тоа не за наводниот документ кој недостасува туку за грешка во архивски број - Просветниот инспекторат не казни за тоа како ја архивираме сопствената документација,  што и не е во негов домен. Сето изживување со парче хартија за кое не ни беше даден совет, не ни беа дадени насоки како да го решиме проблемот туку се работеше на продлабочување на чувството на закана и продлабочување на проблемот за да се дојде до казна - глоба - беше Орвеловско и многу тешко искуство. Мојата колешка пред нејзиното мало дете беше изложена на закани со затвор од просветен инспектор, и требаше да ги прима како да е криминалец а не административно и академско лице кое (можеби) направило техничка грешка и е подготвено да ја исправи. Значи, системот не признава грешка од неукост, нема намера да испрати порака дека ја признава и дека ќе помогне да се исправи туку како да има цел да ве фати во грешка и казни. Целото чувство беше како за државата да се постојат законите единствено за да ги уловат граѓаните во грешка а не обратно. Ваков орвеловски систем е болен и тежок за секој. Претпоставувам, особено е тежок за претприемачите кои се самите и сопсвена администрација, и менаџери и работници па стравот од грешка мора да е огромен. Претприемништвото не може да се развива од проста причина што човек се плаши да проба за СЛУЧАЈНО ДА НЕ ЗГРЕШИ

  Анонимен (35 години, Скопје)